Milagros de Nuestra Señora - La Iglesia profana de Gonzalo de Berceo Tres caballeros eran de una atenençia, Con otro so veçino avian mal querençia, Matarienlo de grado, si oviessen potençia, En buscarli muerte mala metien toda femençia. Tanto podieron ellos revolver e buscar, Ovieronlo un dia solo a barruntar, Echaronli çelada, ca querienlo matar, Mas lo querrien tener que grant aver ganar. Entendiolo el otro que lo querrian matar, Non se osó por nada con ellos acampar, Empezó a foir, qua querie escapar, Movieron luego ellos, fueronlo encalzar. El que iba fuyendo con muy grant pavor, Troçió una eglesia, ovo en grant sabor, Era de la Gloriosa fecha en su honor, Escondióse en ella mesquino peccador. Los que lo segudaban, que lo querien matar, Non ovieron verguenza del sagrado logar: Quisolo la Gloriosa e Dios desamparar, Ovieronli la alma del cuerpo a sacar. Dentro enna la eglesia, de la Virgo sagrada Hi fue esta persona muerta e livorada: Tovose la Gloriosa...